我要做model ...

星期六我地約埋小雞一起去casting,

係一個奶粉廣告...

小雞gel到個頭好靚, 好似一個靚仔小生, 而彤彤就著到紅噹噹咁去扮可愛...

攝影師當日要佢地笑, 但好似唔係好得喎...

彤彤個d笑係好假架.. 一味開大口卡卡兩聲...

諗住幫下彤彤接下job 可以幫佢儲下錢啦...

宜家睇黎都無望啦!!!

我既星媽夢睇怕要醒啦!!!

********

Model做唔成, 咁媽媽咁有比錢你去做Model啦..

原本6個月大剛學識坐個陣就想去影啦..

不過市面太多間影樓都唔知去邊間好呀...

前陣子見到vamama同波仔去影左d studio, 好靚,好可愛,

問左vamama拎左電話打去查問....

因為媽媽都係好唔放心 因為彤彤佢一個冇時停既BB真係好擔心影唔倒...

攝影師話唔洗怕, 因為佢一定有辨法影到架既...

而價錢ok喎, 咁就決定去呢道影啦!!!

********

我地book左今日影相... 4點鐘影..

好.. 有足夠時間比彤彤差下電, 如果唔係唁夠瞓就心情唔靚啦...

影前食埋奶奶...

影相既全程都好順利呀..

攝影師dior 真係瞓晒身黎同彤彤玩&影相, 所以彤彤都好開心呀!!!

而爸爸媽媽都好開心, 不過有d倦, 因為不停跳高爬低氹彤彤呀!!

我地足足影左兩個幾鐘, 真係好好既exercise呀...

講左咁耐, 有相睇啦...

媽媽最like呢一set, 因為夠pure 同自然!!!

賽車手look - 彤爸request, 因為有套車手衫, 而佢地咁啱又有架跑車...

甲蟲look...  好多古怪樣, 又係道擺埋d少女pose.. 都唔知係邊道學番黎....

好鍾意呢d大頭look, 不過d表情真係有d naughty呀!!

家庭相 - 玩得好開, 如果彤彤笑多d重好呀!!!

總結... 影相影得好開心, 而且玩得好開心呀!!!

不過彤彤d 相唔多笑, 只係係道做埋d古靈精怪表情啦...

d相都影好滿意呀!!!  多謝vamama既好介紹呀!!!

下次再影studio相, 希望book一個studio, 約埋其他bb一起去影啦!!!

請幫忙投票..

話說無聊的媽媽係五月己收到Pampers既電話去參加Pampers特級棉柔體驗分享會.

呢個分享會佢介紹比我地Pampers既新改良既片片...

聽完講座每人可有一包新升級的Pampers特級棉柔紙尿片回家試用!!!

試用完後, 媽媽要寫番個用後感然後影埋相upload上Pampers網站等大家投票呀..

最高票數既10位可以有獎品架!!!

咁我就用完之後upload左我d comment同相片啦..

不過不知為什麼Pampers收不到又不告訴我呀!!!

所以要到今天才發現沒有我的comment 在Pampers網上,

call了Pampers, 他們說是technical error, 叫我再email 比他們再upload..

現在upload左啦.. 不過已經遲左成個week投票啦.. 6月30日end..

所以宜家請各位朋友仔幫下忙投下票啦!!!

雖然係輸梗啦... 不過我地都唔想好似拋離大家好遠咁啦!!!

大家投票可以去以下網址:

http://www.pampersbbclub.com/premiumcare/photoalbum.aspx#

不過一個IP只可以一日投一次, 所以請大家呢幾日都努力投啦..

謝謝!!

PS.  唔係賣廣告...Pampers特級棉柔紙尿片真係好好用.. 好柔軟, pat pat 唔怕焗.. 而且兩旁既貼貼係有彈力, 咁bb郁動時可以自如d, 同埋唔怕cool住大脾仔呀!!!

刷牙篇...

彤彤都出在成6隻牙仔啦...

宜家同佢洗口口有d辛苦,

因為我地一放手指入彤彤口佢就咬我地啦...

見到瑤瑤媽買左bb牙刷比瑤瑤,

而幫瑤瑤刷牙仔時佢又好enjoy喎,

咁我地都買左比彤彤用...

不過彤彤唔比我地同佢刷, 佢要自己黎...

又好似刷得幾似模似樣喎!!!

但係你有冇刷到架??

刷刷下又走去玩...

不如媽媽幫彤彤啦...

但彤彤又唔鍾意呀...

係都要自己做...

好啦.. 比你玩住先啦...

用呢支牙刷都係等你有意識要放入口去刷呀..

為左乾淨d, 媽媽都係會同棉花同你清潔架!!!

不過唔該你唔好再咬我啦!!

爸爸的第一個父親節!!

父親節快樂!!!  呢句係我代彤彤同彤爸講既.. 

出年.. 彤彤應該識同爸爸講啦!!!

我地今日有乜野節目啦..

今日約左雞雞去荃灣參加爬行比賽呀!!!

好多謝同埋唔該晒JoJo姐姐一早同我地落去排隊取籌呀!!

雞雞就2:30pm 比賽, 而彤彤既賽事就係3:00pm

呢場係派仁哥同埋雞雞出賽,

而彤彤個場就係由彤爸同埋彤彤出賽啦...

睇下兩個爸爸叻唔叻先.... 

雞雞佢就掛住溝隔離妹妹... 

而彤彤就係掛住玩隔離line d 玩具呀.. 所以爬得第2...

兩位爸爸都成績都唔太好呀.. 

因為佢地兩知個好唔合作, 所以經大家相談過之後就決定再玩一次啦.. 希望吸收左第一次既經驗可以令佢地爬得快d啦!!!

第2埸會係4點幾開始..

咁重有時間點打發好呀??

我地去左荷花換片片啦...

雞雞好乖咁瞓係道換片,  不過彤彤冇時停, 佢重走去攪雞雞呀!! 好naughty!!

仁哥, 你以後唔好再話雞雞naughty啦... 你睇下... 　

彤彤呢d先叫Naughty呀!!!

換左片,我地就返去會場道等比賽啦...

兩個bb係道玩...

雞雞好乖又可愛,成日笑咪咪....

不過彤彤就好naughty啦, 一唔啱就扭計啦...

又成日攪攪震... 

終於等到比賽時間啦...
雞媽同雞雞出賽, 我同彤彤出賽....

我地呢兩組媽媽組果然勁.....

我地令到兩個bb努力地爬呀....

而彤彤重可以成功去到終點得到第一名呀...

贏左有乜野獎呀??係冇架...

呢場只係初賽... 贏左後要睇下係咪最快個100名BB, 如果入圍就可以8月8日去總決賽啦!!!

得唔得都冇所謂啦... 我地都係至在比BB參加佢人生既第一次比賽...

睇下, 爬完有証書架!!!

玩完晒後, 我地大家就各自歸家差一差電先!!!

晚上就出發去瑤媽shop啦!!

瑤瑤...好耐冇見啦..

你大個左好多呀... 仍然都係好乖乖呀!!

三個b都係道玩, 間中有d搶玩具玩既情景, 不過好彩冇爭到!!

3b係道玩, 爸媽們係道傾計..好relax &開心!!

好難得先影到佢地3個b企定定...

晚飯本想出去食, 但因為father's day出面好多人, 而我地又有3個b應該會好難找位的!!!

所以最後都係決定買外賣返黎瑤媽shop食!!

我地買左豬媽既推介... 泰發...

有 :  泰式炒通菜, 蒜蓉飽, 椰青咖哩海鮮, 炒金邊粉, 蝦醬炒飯, 生蝦刺身, 同埋檸檬燒牛肉...

嘩.. 真係好好食呀!!  d生蝦好新鮮, 椰青咖哩海鮮d椰青好甜好滑, 燒牛肉好正 .... 

唔怪之得vamama, 晴晴媽佢地老遠都要黎九龍城買外賣食啦!!

好... 我支持你地.. 下次去九龍城一定要食泰發...

食飽飽就返屋企啦...

爸媽要為明天返工作準備呀!!!

When Chloe Meets Elmo

媽媽冇見彤彤十日, 彤彤一定好悶啦,

所以媽媽趁住星期日得閒, 同彤彤去Toy"r"US玩啦!!!

呢次去同早幾個月去唔同, 因為彤彤大個左啦... 識玩啦...

見到豬豬個鼻仔郁郁下, 好開心咁打人地個鼻...

同埸重有隻熊貓仔, 不是因為佢個鼻仔唔識郁,

彤彤我知你鍾意豬豬呀.. 不過我唔會買比你架.. 因為上次買左隻會郁既dog dog 比你.. 你唔洗兩日已經攪到人地唔識郁啦!!!

見倒Elmo, 原本好開心架...

不過當發覺elmo係識郁既時候就開始有d驚啦...

佢個表情好似攪笑呀, 好想走.. 唔比elmo 摸佢.. 哈哈哈...

奇怪.. 頭先隻豬豬都會郁啦, 你又唔驚??

呢個跳跳跳彤彤都好鍾意玩呀!!

只用手仔拍下d玩具呀!!! 

記得幾個月大都有同彤彤黎玩呢個跳跳跳,

當時佢重好細, 坐都未穩...

宜家既經識爬認坐啦..

見到豬媽放左豬豬細個既相, 今日見彤彤又坐番係呢個玩具道, 我地又黎做個大對比先!!!

真係大個左好多呀!!!

9個月大啦!!!

因為去左旅行同埋要寫旅行記冇同大家update彤彤既近況...

好多fans已經叫我快快update彤彤既近況啦...

好啦.. 宜家出彤彤9個月大既進度情況啦...

*********

一般情況:

體重:  ??  (冇去磅到... 不過應該重左)

身長: ??  (自己度唔知準唔準) (我地都覺得佢長左!!)

牙仔:  原本下面兩隻... 宜家上面出緊四隻... 入面大牙又吽緊!!!

係我地旅行期間, 原來彤彤吽緊牙仔, 所以個後時間真係辛苦ee啦...

不過唔知係咪因為吽牙仔, 所以彤彤忟憎左好多!!

食野情況:

有3餐奶奶, 兩餐粥仔, 1餐粉粉

7:30am - 早餐 - 奶奶

9:00am - Morning Tea (一小碗字母粉, udon, 等)

12:00nn - 午餐 - 粥仔

3:00pm - 下午茶 - 奶奶,餅餅,水果, yogut

6:00pm - 晚餐 - 粥仔

8:00pm - 小食 (水果)

9:30pm - 消夜 - 奶奶

早晚奶奶係 180-200ml,

奶奶唔多愛, 無論你比幾多奶幻佢次次飲都係剩番20ml... 好準.... 點解呢??

(想問下各位... 9個月大要轉大仔奶粉啦... 你地轉唔轉呀??)

粥仔,粉粉 同水果最鍾意... 總知唔係奶奶就得啦!!!

水果最like 係西瓜同埋木瓜, 其次係strawberry... 不過其他彤彤都愛!!!

唔知係咪天氣熱... 所以飲多左好多水... 咁就好啦!!! 不過彤彤重未識得用杯啜呢....

片片:

都係重用緊M size...

有時出街要帶定學習褲, 因為換片時會可停反身偷走...

每日一定用痰罐去便便...

每次瞓覺前,瞓醒, 飯前, 飯後, 玩玩下都會同佢坐痰罐...

宜家好多時係屋企都唔比片片佢著... 要勤d同佢坐痰罐,

不過彤彤呢排好唔合作, 係痰罐唔wee wee... 有時坐左45min都唔去.. 但一起身就 wee wee啦.. 真係激死呀!!!

希望彤彤快d有意識去wee wee 啦!!!

學野方面

~ 重同佢玩緊flash card, 仍然唔專心啦.. 成日要搶張card黎食...

~ toliet training 算ok啦...

~ 爬行... 好快... 就算前面有野, 佢一樣好少理, 爬過去!!!

~ 企...  識得走去扶住D野企起身...

~ 行... 自己起左身後會扶野行來行去

~ 學習食固體食物- 粥仔, 餅餅, 水果, 粉粉

~ 識得拍手, byebye, 點蟲蟲, 錫錫, 扮瞓覺, hi, 不過當然唔係一叫就做啦... 要睇心情!! 

~ 見到聽到鍾意既廣告/歌(Daikin冷氣, Disney, 畢打自己人) 會拍手同埋un un 下..

~ 去上 playgroup, 總算肯定定地聽下老師唱歌, 講野, 不過成日自己爬左出去令媽媽好唔好意味!!

~ 好鍾意同小朋友玩,亦好爛玩

~  重未肯發音叫爸爸, 媽媽, 奶奶, 或 mum mum...  只係係道呀呀呀...

瞓覺情況

~ 仍然係自己瞓覺, 不過有時都要拍一陣先肯瞓...

~  超八掛同心野, 八掛情度係好眼瞓都唔肯瞓 

~  有時瞓左隻手仔都不停係道玩...

~  有時瞓瞓下自己會爬起身.. 望兩望又瞓番

~ 上午個覺會由9:30am 瞓到12nn, 下午瞓少d ,瞓大約1-2 鐘頭...

~  晚上瞓覺時都會叫1-2次.. 有時要奶咀, 有時拍下就ok...

~ 不過呢排吽緊牙仔有時半夜會喊, 奶咀都唔肯要

~  眼見好多bb瞓覺都可以一覺到天光, 希望彤彤快d都可以啦!!!

Overall

發覺佢地真係大得快左好多呀!!

天天都有變化同埋驚喜

有時見倒彤彤瞓係道自己飲奶奶, 覺得佢地似一個小朋友多過似一個bb呀!!

希望佢出牙仔唔好咁辛苦啦, 咁樣就可以瞓得好D, 同埋個人就冇咁忟憎啦!!!